Taliban yapongeza kurejea kwa marubani watano wa jeshi la anga - Swahili Viuhapa

Wizara ya Ulinzi ya serikali ya Taliban nchini Afghanistan imetangaza kwamba marubani watano wa jeshi la anga la Afghanistan (AFF) waliokimbia nchi hiyo wakati kundi la Taliban lilipochukuwa mamlaka kwa nguvu mnamo mwezi Agosti, wamerejea nchini humo baada ya mashauriano na serikali hiyo ya Kiislamu.

Katika taarifa, wizara hiyo ilidai kuwa marubani hao walitoroka nchini humo kufuatia ushindi wa Taliban mwezi Agosti, lakini sasa wamerejea kutokana na himizo la mpango wa mamlaka hiyo kutumikia tena katika jeshi la anga la nchi hiyo. 

Picha iliyotolewa na wizara hiyo, ilionyesha marubani hao waliorejea wakikaribishwa na waziri wa ulinzi wa Taliban Mullah Yaqoob Mujahid. Nyuso zao zilifichwa na hakuna habari zaidi zilizotolewa. 

Wakati serikali ya awali ya Afghanistan ilipopinduliwa, mamia ya marubani waliopata mafunzo kutoka kwa Marekani walitumia ndege za jeshi la anga la Afghanistan kutorokea katika mataifa jirani ya Tajikistan na Uzbekistan kwa kuhofia mashambulizi ya kisasi iwapo wangebaki nchini humo.