NATO yatarajia wanajeshi 30,000 wa Urusi kuingia Belarus ndani ya wiki chache - Swahili Viuhapa

Katibu Mkuu wa Jumuiya ya Kujihami NATO Jens Stoltenberg, amesema takribani wanajeshi 30,000 wa mapambano kutoka Urusi wanatarajiwa kuwasili nchini Belarus katika wiki zijazo, na kuelezea wasiwasi juu ya kuongeza kwa wanajeshi wa Urusi karibu na Ukraine. 

Stoltenberg ameyasema hayo kufuatia mkutano na waziri mkuu wa Macedonia Kaskazini Dimitar Kovacevski. “Katika siku zilizopita, tumeshuhudia uhamishaji mkubwa wa vikosi vya jeshi la Urusi kuingia Belarus. Idadi hii ni kubwa tangu enzi za vita baridi. Tunazungumzia uwezo mkubwa wa zana za kisasa za kijeshi. 

Yote haya yatajumuishwa na luteka za kila mwaka za vikosi vya nyuklia vya Urusi zinazotarajiwa kufanyika mwezi huu,” alisema Stoltenberg. 

Urusi inapanga kufanya luteka za kijeshi nchini Belarus, mshirika wake wa karibu katikati mwa mwezi huu, na imeashiria kuwa wanajeshi chini ya 13,000 watashiriki. 

Washirika wa Magharibi wanahofia kwamba Moscow huenda inapanga uvamizi dhidi ya Ukraine. Lakini Moscow inakanusha madai hayo na inayatuhumu mataifa ya NATO kwa kuchochea mzozo.