Baraza la mpito la Giunea lafanya kikao chake cha kwanza - Swahili Viuhapa

Baraza la mpito nchini Guinea, ambalo lina jukumu la kuandaa kurejea kwa utawala wa kiraia baada ya mapinduzi ya kijeshi mwaka jana ya serikali ya rais Alpha Conde, lilifanya kikao chake cha kwanza jana Jumamosi. 

Shirika la habari la Ufaransa AFP limeripoti kuwa wanachama wote 81 wa baraza hilo la mpito la kitaifa, linalojulikana kama CNT, walihudhuria kikao hicho cha ufunguzi katika majengo ya bunge mjini Conakry. 

Kikao hicho kilichofunguliwa na rais wa CNT Dansa Kourouma na pia kuhudhuriwa na waziri mkuu wa mpito Mohammed Beavogui, mtaalamu wa maendeleo, kilichukuwa saa kadhaa. 

Katika hotuba yake, Kourouma alisema kuwa mabadiliko makubwa katika mifumo ambayo inawaleta wasomi madarakani na kuwaruhusu kusalia madarakani kwa muda usiojulikana ni tatizo ambalo lazima litatuliwe kwa uhakika.

Alitaka katiba itungwe katika hali ambayo haitarekebishwa kirahisi, akimaanisha Conde, ambaye alizua hasira kwa kubadilisha katiba ili kuwania muhula wa tatu.