Ramsey: Ronaldo ni mchezaji wa kipekee kwa wakati huu

SUPASTAA wa Juventus, Cristiano Ronaldo, amefagiliwa na mchezaji mwenzake, Aaron Ramsey kwa uanamichezo wake, ubora na kufuata maadili ya kazi yake.

Ronaldo alikuwa akifurahia msimu mwingine bomba baada ya kufunga mabao 25 katika mechi 32 kabla ya msimu kusimamishwa na Corona. Ramsey alitua Turin mwanzoni mwa msimu huu akitokea Arsenal lakini ameshaona vitu vya tofauti kwa Ronaldo.

“Ni mchezaji wa kipekee,” alisema Ramsey. “Ni wa kwanza kwenda gym, anakuwa wa kwanza kwenye kila kitu. Ni mpambanaji, anataka kushinda kila mechi, akimaliza, anaanza kupiga mazoezi ya mipira ya faulo na mambo kama hayo.

“Huhitaji nikwambie jinsi alivyo mkali, ni mmoja wa wachezaji bora katika historia ya soka.” Ramsey, 29, raia wa Wales, aliamua kujiunga na Juve akitokea Arsenal ambako alishinda makombe matatu ya FA.

Ramsey alisema aliamua kwenda Juventus ili kutwaa makombe zaidi, likiwemo la Ligi ya Mabingwa Ulaya